2015年2月6日星期五

始終都係要回到原點

今日睇到有位同事黑晒面口行嚟行去,最後先知發生咗乜嘢事(猜嘅)。

話說我哋部門已經向外宣布只有MO先可以轉介病人,但係外科部門仲係明知故犯,仲係HO轉介病人。我本身就對HO轉介病人方面係冇咁介意,只要佢哋可以講述病人嘅病歷,仲要點解要我哋嘅意見。

我嘅呢位同事就收到HO嘅來電,轉介病人。我本身係有同呢位HO一齊共事,佢係有能力好清楚咁講述病人嘅病歷,係一位好好嘅HO,以後大把前途。好可惜礙在佢仲係HO嘅身分,我呢位同事就好介意,要佢MO嚟同佢講述。

好喇,呢次輪到個MO嚟講話。雖然口齒伶俐,好可惜對於個病歷乜都唔知。最後都係要去睇個病人。

我心諗,反正到最後都係要睇個病人,何必咁介意對方嘅身份?最後都係換嚟自己嘅負面情緒⋯⋯

2015年2月4日星期三

小談電視

最近睇到一段片,雖然講嘅係香港現況,但係我覺得呢句話都係適合於本地。

話說fb嘅流行,多多少少都關係到電視節目唔好睇。講起嚟好次九唔搭八,諗深一層,呢個講法並不無道理。

呢架啲人,邊度仲睇電視架?不只唐人,就連其他人都連國立電視都唔睇。

你嘥咗咁一大筆錢製造呢啲毫無素質嘅電視節目,啲人覺得唔好睇,乾脆閂咗個電視,唔睇。唔睇電視就冇嘢做,唔同仲掛住做工作上嘅嘢咩?梗係坐喺電腦前面玩fb架喇。fb上又有咁多對你有負面嘅新聞,一個唔覺意就一齊煽動電腦前面啲人去反你架。你點都鬥唔過佢哋架。

所以講,電視節目嘅素質,對整個社會真係影響好大。