2014年7月14日星期一

呢度都變咗

今日行過KL市區一轉,感覺好次好奇怪。

首先趟LRT,座位唔見晒,唔知係唔係翻新翻唔切,或者係特定嘅,淨係留抵長者同弱勢社群嘅座位。心諗呢個係唔係畀啲人喺繁忙時間一齊逼沙丁魚呢?用最少嘅空間嚟裝最多嘅人,呢個好經濟下嗻⋯⋯我當堂直接聯想到以前喺印度時一齊同啲tempe逼巴士一樣。好在呢趟嘅車廂好少人,唔駛逼。

我嘅目的地係劉葉廣場。去嗰度需要喺KL Sentral度落車,再轉搭Monorail先至去得到目的地。另一個方法就係比較原始嘅,要嘅Pasar Seni落車,途經茨廠街、Puduraya、同善醫院嘅15分鐘行程。畀著以前嘅我會選擇用呢嗰方法,但係呢架已經食到肥斯大隻、老咗幾歲嘅我,算喇,洗多兩蚊就可以怪返好多腳骨力,梗係選擇搭Monorail喇。

KL Sentral大廈同佢嘅Monorail站係喺唔同地方;之間相隔咗兩條大街。以前就要喺烈日當下步行5分鐘左近,又要聞巴士車嘅臭屁,落雨時就寸步難移,直頭就係會大叫粗口嗰種。呢架兩條大街之間就多咗一棟商場(Nu Sentral),應該係啱啱起好嘅。有咗空調,多咗好多嘢睇(但係就買唔起),少咗好多麻煩。

行到Monorail站之後至諗起幾日前因地冧而停止Hang Tuah同Imbi之間嘅Monorail 服務。哎,唯有喺Hang Tuah落車,行去劉葉。到最後都係要我行多啲路。

還掂都係要行路,返時我最終都係選擇行去Pasar Seni站。途徑茨廠街時已經兩點幾三點咗。呢度真係今時唔同往日。以前呢度咁嘅時候一定係逼爆晒人,行都行唔到。呢架人就少咗好多,人種更加唔同。十個八個變晒孟加拉尼泊爾緬甸人。本地商家剩下小貓兩三隻。就連嗰個追住你問你要唔要阿鳳嘅龜公仔都唔見咗。先前仲話要保留本土文化嘅人,應該都唔見晒呱⋯⋯

仲有嘅係,呢架行都好多地方,都聽唔到年輕細仔講廣東話咗;一係就講本土英語,一係就係華語。雖然呢個現象我喺幾年前都已經發覺到,但係真係冇諗到會進一步惡化到咁快。粵語已經算係比較強勢嘅方言,都淪落到咁嘅田地,遲早一日喺呢個世界真係好可能會冇人再識講任何方言。心寒~

2014年7月13日星期日

煥然一新

舊嘅已過,迎接新嘅,即係去舊迎新。
呢度主要係用粵語書寫,間唔中會用華語(普通話)同英文,睇心情。
同之前嘅blog一樣,呢度都係不定時更新,可能成年都未必一次,都係睇心情。
如果懷念以前嗰個blog嘅話,好對不住,我已經刪除咗。

心情麻麻,嘅咁先,就此擱筆。